Resulta sa eleksiyon di ma-hack: Cadungog

GIPANEGURO sa Commission on Elections sa Sugbo sa mga bo­tante nga dili ma-hack ang resulta sa piniliay sunod buwan bisan og nasulod sa mga hacker ang website niini.

Si Cebu City acting North District Election Officer Edwin Cadungog nipasalig nga magpabilin ang seguridad sa kasagrado sa mga boto sa umaabot eleksyon tu­ngod kay protektado ang ilang mga makina ug luwas usab ang transmission ug anaa silay hard copies nga maoy basehanan sa resulta kon adunay mokuwestyon sa resulta.

“I assure you 100 percent way hacking nga mahitabo sa atong election,” pasalig niini dihang nahinabi sa mga tigbalita kagahapon.

Si Atty. Jose Nick Mendros, director sa Comelec 7, niingon ang database sa mga botante anaa sa tagsatagsa ka buhatan sa Comelec sa kalungsuran ug mga siyudad.

Matod niya, ang na-hack sa mga hacker mao lang ang website sa Comelec diin makita o mabasa sa publiko ang listahan sa mga botante ug kon asa kini nga pre­sinto nasakop, mga resolution ug ubang pahibawo sa komisyon sa piniliay.

Usa sa mga suspek sa pag-hack sa website sa Comelec nadakpan na sa mga sakop sa National Bureau of Investigation sa kaulohan niadtong Miyerkules sa gabii.

Si Paul Biteng, 23, nasikop gumikan sa intelligence report nga nahipos sa Cybercrime Division sa National Bureau of Investigation (NBI) human sa tulo ka semana nga digital ug human surveillance.

Base sa report, ang maong suspek bag-o lang naka-graduate sa kursong Information Tech­nology gikan sa Sampaloc, Manila.

Gisubay sa NBI kon dunay kalambigitan si Biteng sa usa ka lokal nga grupo sa mga Internet hacker nga gitawag og Anonymous Philippines, nga unang niangkon nga maoy nag-hack sa website sa Comelec niadtong Marso 28.

Si Cadungog niawhag sa mga botante nga mobisita sa ilang buhatan gikan sa Lunes hangtod Dominggo aron masayran kon unsa sila nga presinto nasakop ug mobotar.

Related posts