PRO-Davao: 5 pulis nga gidagit di POWs

DILI matawag nga mga Prisoner's of War (POW) ang lima ka mga pulis nga gibihag sa mga rebeldeng New People's Army (NPA) sanglit wala kini sa pakiggubat.

Kini ang katin-awan ni Police Regional Office (PRO)-Davao director Manuel Gaerlan atol sa Armed Forces of the Philippines-Philippine National Police press conference didto sa Task Force Davao Headquarters Miyerkules.

Sumala ni Chief Superintendent Gaerlan nga sibilyan ang mga pulis ug di militar nga kanunay ma-engkuwentro sa mga rebelde sa kabukiran.

"They (policemen) are civilians, hindi sila military personnel. Wala sila (pulis) sa giyera nga maoy nakigbatok nila (NPA), naa sila didto to help people kay naay nadawat nga tawag si PCI Tarongoy nga magpatabang," sulti ni Gaerlan kinsa nagtumbok nga di matawag nga POWs ang lima ka pulis nga gibihag.

Una niini, ang NPA nagpagawas og pamahayag nga ang lima ka mga pulis nga sila Chief Inspector Leonardo Tarongoy, Police Officer 3 (PO3) Rosenie L. Cabuenas, PO3 Rudolf Pacete, PO3 Abdul Azis A. Ali Jr., ug Police Officer 2 Neil C. Arellano, mga POWs ug ilang gikustodiya.

"No, we did not received any," ingon ni Gaerlan kung duna bay gipangayo nga bugti ang NPA sa ilang pagdagit sa lima ka pulis.

Gidayeg ni Gaerlan si Tarongoy nga usa kini ka matinabangon nga tawo, buotan ug walay isyu sa pagka-pulis.

"Buotan ni si PCI Tarongoy. In fact, pastor ni siya," sulti ni Gaerlan.

SITG Mapula

Si Gaerlan nagbutyag nga ilang gimugna ang Special Investigation Task Group (SITG) Mapula nga maoy motutok sa paghimo og imbestigasyon ug mo-monitor sa gihimong search and rescue operations.

Ang SITG Mapula gilangkuban ni Davao City Police Office (DCPO) Director Police Senior Superintendent Vicente D. Danao Jr., Chief Inspector Johanna May Lagundi, Superintendent Noemi Auestero, Superintendent Francis Donald Brillante, Chief Inspector Ramil Macarampat, Chief Inspector Milgrace C. Driz, Inspector Bryan Deiparine, ug imbestigador nga sila Senior Police Officer 4 George Alojado ug PO3 Luther Napoles. (JPC)

Related posts