‘Pari’ dakpan sa buy-bust

MIDSAYAP, NORTH COTABATO - Nasignit sa mga otoridad ang nagpailang pari nga nalambigit sa ilegal nga druga, alas 6:15 sa buntag niadtong Lunes.

Giila ang suspek nga mao si John Ferolin, molupyo sa Barangay Katingawan, Midsayap.

Nagpaila si Ferolin nga pari sa Salesian Missionary ug sa Military Ordinariate of the Philippines nga kanhi nadestino sa Caloocan City Archdiocese.

Gibutyag ni Midsayap police chief Tom Tuzon nga naglusad ang kapulisan og buy-bust operation duol sa bay sa suspek hinungdan sa iyang pagkasikop.

Nakuha gikan sa posisyon sa pari ang shabu nga nagkantidad og P7 mil sulod sa iyang bag.

Sumala kang Tuzon nga anaa sa ilang listahan si Ferolin nga dugay na nilang gipanid-an nga namaligya og gidiling druga.

Gikanayon nga kapila na ka higayon nga nagmisa si Ferolin sa mga simbahan sa Midsayap ug Libungan sa probinsiya ilabi na sa mga misa sa patay.

Apan siya gipaundang sa pagmisa sa diha nga migawas ang taho nga kuwestyonable ang iyang pagka-pari.

Gipamahayag sa amahan sa suspetsado nga si kanhi Barangay Kapitan Marcelo Ferolin nga pari ang iyang anak, usa ka decon ilawom sa Salesian Missionary.

Ang kapulisan padayon nga nagsusi aron matumbok ang tinuod nga pagkatawo ni Ferolin ug ang pagkalambigit niya sa pagpayuhot sa gidiling druga.

Source: Sun Star

Related posts